"مات بحسرته بسبب وعود النجوم الكدابة".. صديق الفنان عاطف سعيد يكشف معاناته قبل رحيله

كتبت- منال الجيوشي:

رحل عن عالمنا اليوم الخميس الفنان عاطف سعيد، وروى صديقه عبر حسابه بموقع فيسبوك عن معاناة الفنان الراحل من قلة العمل خلال أيامه الأخيرة.

وكتب: "إنا لله وإنا إليه راجعون، انتقل إلى رحمة الله تعالى منذُ قليل الفنان الأستاذ عاطف السعيد، سامحوني على الكلام اللي هقوله ده لكن أنا حزنت حزن شديد لما عرفت الخبر".

وتابع: "كنت كل ما أعدي من جنب قهوة صدفة اللي جنب المعهد كنت ألاقي عم عاطف قاعد لوحده مهموم كان أول ما يشوفني يقول لي تعالى اقعد اشرب معايا شاي.. اقعد معاه يقعد يشتكي ليا من قلة الشغل ويحكي ليا قد إيه هو بيحب الفن ومش عارف يعمل حاجة غيره رغم ظروفه الصحية والمادية الصعبة ويقعد يحكي ليا عن مواقف ووعود كذابة بياخدها من نجوم كبار".

وأضاف: "كان عايز ينزل تصوير بأي شكل وكانت آخر مرة شوفته كانت من حوالي أسبوعين كنت في تصوير ولقيته هو وابنه اللي ربنا يتولاه من بعده في اللوكيشن بالصدفة ف بسأله بتعمل إيه هنا يا عم عاطف رد وقالي جي أسعى وأقابل المخرج والنجم فلان علشان كان قايل لي إنك معايا في المسلسل اللي جاي".

واستكمل: "قال لي يا عمر أنا ممكن أعمل زي ناس كتير وأنزل بوست وأطلب شغل وأعمل زي كل اللي بيعملوا كده النهاردة لكن كرامتي متسمحش لي أعمل كده، واللي مزعلني بجد إنه كان مكلمني من أسبوع وطلب مني إني أروح معاه لشركة لما عرف إن صاحب الشركة صديقي وأنا وعدته أول مارجع القاهرة هكلمه ونروح سوا".

وتابع: "سبحان الله كان في بالي امبارح إني أكلمه وأقوله إني راجع خلال يومين لكن ربنا افتكره، عم عاطف كان راجل محترم ومكافح وعنده عزة نفس، عم عاطف كان فنان جميل وقدر يعلم معانا بمشاهد بسيطة لكن أثبت وجوده بيها، وطول مانا معاه كانت الناس لما تشوفه تجري تتصور معاه وكان بيبقى فرحان أوي".

واختتم حديثه قائلا: "سامحوني على كلمة عم لكن أنا كنت متعود أقولها له، الأستاذ عاطف مات بحسرته لكن راح لربنا العدل، وكان فيه كلام كتير لكن للأسف مش كل اللي اتقال يتحكي، ربنا يرحمه ويغفرله ويسكنه فسيح جناته ويلهم أهله وذويه الصبر والسلوان".