توجه نصيحة للجمهور.. نهى العمروسي: "ظاهرة مش طبيعية تصيب كوكب الأرض"

كتبت- منى الموجي:

علقت الفنانة نهى العمروسي على تفاعل الجمهور مع حوارها الذي عُرض أمس الخميس 15 سبتمبر في برنامج كلام الناس على قناة MBC مصر، معربة عن سعادتها بوجود صدى لكلامها عن قوة تأثير الكلمة لدى من شاهدوا الحلقة.

وكتبت عبر فيسبوك: "كان نفسي برضو إنكم تاخدوا بالكم من رسايل تانية قلتها أعتقد إنها مهمة، منها القبول، إزاي تقدر تقبل أي حاجة تحصل لك مهما كانت محزنة أو مؤلمة لإنها (مكتوب)، قدر، القبول ده مفتاح السعادة والرضا.. فيه برضو حاجة تانية أظن إنها رسالة مهمة عن (إدمان النت) وخطورته على المجتمع وإنه مرض بيتعالجوا منه في المصحات اسمه الـ Internet psychosis ، وإزاي خلانا نفقد التواصل الإنساني وأد إيه إحنا بنتبرمج من خلاله".

وتابعت نهى "الرسالة التالتة كانت عن طاقة كوكب الأرض اللي واقفة أو حاصل لها blackout لليوم العاشر النهاردة، لإن دي ظاهرة مش طبيعية خالص إن الأرض فجأة ما تصدرش طاقة، الطاقة دي اسمها ال Schuman Resonance 7.83 Hz ,، اعملوا سيرش علي الكلام ده عشان تتأكدوا وعشان تتنوروا بمعلومات أكتر عن أمنا الأرض وإزاي طاقتها دي بتشفي أرواحنا مش بس أجسامنا".

وأضافت "اتصلوا يا جماعة بالطبيعة، اقعدوا على الأرض امشوا حافيين على الرمل، بصوا للسما والنجوم والقمر واتأملوا إعجاز ربنا، اتصلوا بالطبيعة، وافصلوا عن الحياة الإليكترونية اللي بتجيب العيا ولو حتى يوم، جربوا تعملوا كده وهتحسوا بفرق شاسع".

واختتمت "بصراحة المعرفة هي اللي شاغلة وقتي ودماغي بقالها فترة طويلة، وده اللي أحب أشاركه مع الناس وأكيد ده أجمل وأقيم من تريندات الفضايح والتنمر، لإن المعرفة نور والجهل عتمة وضلمة، والنور هو طريق ربنا والضلمة هي طريق الشيطان".

نهى العمروسي ممثلة كبيرة وقف أمام كبار نجوم الفن، بينهم: عادل إمام، نور الشريف، سميرة أحمد، نبيلة عبيد، يسرا، أحمد بدير، يونس شلبي، وقدمت مجموعة كبيرة من الأعمال السينمائية والتليفزيونية، بينها: مطلوب عروسة، جزيرة الشيطان، أميرة في عابدين، حارة برجوان.