إعلان

أزمة جديدة في نقابة المهن الموسيقية.. حسن دنيا لـ مصراوي: "بياخدوا حقوقنا"

11:30 م الثلاثاء 28 يونيو 2022

إبحث عن لوجو مصراوي داخل الموقع يومياً خلال شهر رمضان للفوز بجائزة

تسجيل الدخول

كتب – وائل توفيق:

قال الملحن حسن دنيا، عضو مجلس إدارة جمعية المؤلفين والملحنين، إن هناك خلافات بين الجمعية ونقابة المهن الموسيقية، بخصوص تحصيل الحقوق عن الحفلات و "الدي جي" والأفراح، رغم حصولهم على قرار بتحصيلها - على حد قوله.

وأضاف في تصريحات خاصة لـ "مصراوي": "المشاكل اللي ما بينا تخص موضوع الدي جي والتحصيلات من الحفلات، هما بيعاكسونا وبيقولوا إنتوا ملكوش حقوق، المفروض الدي جي بيبث أغاني، هم بياخدوا حقوق أكتر مننا".

وتابع: "بياخدوا حقنا كله، يعني إنت قاعد في فرح، فالدي جيه بيلعب أغاني، الأغاني دي ليها شاعر وملحن، وزمان حسن أبو السعود عمل إيه؟ كان الدي جي لسه طالع ساعتها، وراح للوزير، وقاله يا فندم الدي جي ده بوظ الدنيا، المفروض يبقى مكانه أربع أو خمس موسيقيين وإحنا بندفع للأرامل ومعاشات، راح الوزير مديله تصريح بالدي جي، يحصل حقوقه".

واستكمل: "ننزل إحنا ناخد حقوقنا بقى، يقولك لأ، إنت ملكش حق، الأفراح كده برضه، أنا بالنسبة لي كملحن ببيع الأغنية مرة واحدة، لكن المطرب بيبعها كل يوم، لما بينزل يشتغل ويغنيها، فالنقابة بياخدوا من المطرب، لكن احنا مبناخدش، ولا بنهوب ناحيته ولا ناحية العازف الموسيقى، احنا بنكلم الراجل اللي عمل الحفلة، بنروح للمنشأة أو الشركة أو المتعهد اللي عملوا الحفلة، بناخد منهم عن الأغاني اللي غناها المطرب مش عن عمله كمغني، وبناخد فلوس 3 تعريفة، قليلة جدا، والنقابة بتقولنا انتم ملكوش حق".

واختتم دنيا حديثه قائلا: "احنا واخدين قرار وزير من شهر 6 أو 7 من السنة اللي فاتت 2021".

وتأتي هذه الأزمة بعقب أزمة تقديم الفنان هاني شاكر لاستقالته وتخليه عن مقعد نقيب المهن الموسيقية بسبب خلاف نشب في المؤتمر الذي عقد لاعتذار مطرب المهرجانات حسن شاكوش لشعبة "الإيقاع" بنقابة المهن الموسيقية.

وأعلن هاني شاكر خلال مداخلة هاتفية مع الإعلامية لميس الحديدي ببرنامج "كلمة أخيرة"، مساء أمس الاثنين، عن تقديمه الاستقالة منصب نقيب المهن الموسيقية، عقب التراشق الذي تم في المؤتمر الذي عقدته النقابة من أجل تقديم مطرب المهرجانات حسن شاكوش، اعتذاره عن الإساءة التي وجهها إلى عازفي الإيقاع.

شاكر قال: "بعد المشهد اللي حصل النهاردة، حسيت إن هيبقى صعب أكمل الفترة اللي باقية ليا، ووصلت لمرحلة خلتني مش قادر أكمل، وأنا بشكر أعضاء الجمعية العمومية المحترمين اللي وقفوا جنبي".

وتابع: "مشهد النهارده خلاني أعيد حساباتي، وأنا باخد القرار بلا رجعة وقدمت استقالتي على الهواء، وبكرة هتكون قدام مجلس النقابة، وإن شاء الله الجمعية العمومية تختار الأصلح، باخد قراري بسبب مجمل الضغوط وواقعة اليوم قصمت ظهر البعير".​

فيديو قد يعجبك: