حسن دنيا: "جمعية المؤلفين والملحنين لم تتلق شكوى من شاكوش أو مدين "

كتب – وائل توفيق:

صرح الملحن حسن دنيا، عضو مجلس إدارة جمعية المؤلفين والملحنين، أن الجمعية لم تتدخل في أزمة اتهام حسن شاكوش ملحن أغنية "حاجة مستخبية" بالسرقة والاقتباس.

وقال في تصريحات خاصة لـ "مصراوي": "إحنا في الجمعية عارفين أن الطرفين، مرتاحين ومتفقين مع بعض على الأرباح والحقوق، ومحدش قدم شكوى من الأول خالص، هما راحوا قدموا شكوى في المحكمة الاقتصادية وخدوا حكم، ولو حد فيهم قدم شكوى دلوقتي هنقبلها طبعا ونحقق فيها".

وتابع: "وهنحقق الأول، نشوف اللحن مدون عندنا في الجمعية ولا لأ، في ملف المؤلف والملحن، هنلاقيه موجود، وبالتالي المتضرر ممكن يوكل حد من محامين الجمعية، وبعد كده المحكمة الاقتصادية بتجيب خبير فني، وبتسمع الحاجات دي، وده حصل قبل كده، والشركة اللي أنتجت الأغنية قبل كده، خدت حكم وبياخدوا الربح بتاع الإنترنت".

وكان مطرب المهرجانات حسن شاكوش، خلال ظهوره في برنامج "الحكاية" الذي يقدمه الإعلامي عمرو أديب عبر قناة MBC مصر، علّق على اتهامه بسرقة لحن أغنية "حاجة مستخبية" للفنان محمد حماقي، واستخدامه في مهرجان "بنت الجيران"، وقال: "حماقي عامل أغنية اسمها (حاجة مستخبية)، كان بقالها 5 سنين على يوتيوب عاملة 16 مليون".

وأضاف: "قالوا إحنا سارقين لحن (حاجة مستخبية)، وحصلت مفاوضات خاصة بأرباح موقع يوتيوب بين شركتي وشركة النجم محمد حماقي، واتفقنا تتقسم أي أرباح على 3 شركات.. اللي عرفته إن (حاجة مستخبية) اللحن أصلا مسروق من لحن تركي".

أغنية "حاجة مستخبية" غناء محمد حماقي، كلمات محمد عاطف، لحن محمد مدين، توزيع أحمد إبراهيم، وطرحت في أغسطس 2014، ووصل عدد مشاهداتها عبر موقع يوتيوب إلى ما يزيد عن 115 مليون مشاهدة.

مهرجان "بنت الجيران - بهوايا أنتي قاعدة معايا"، غناء حسن شاكوش وعمر كمال، كلمات مصطفى حدوتة، وتوزيع إسلام ساسو، وتم طرحه في ديسمبر 2019.