رأي حسن يوسف في عهد عبد الناصر: شوفت باشا مشلول.. والملكية كانت أفضل

حوار- محمد عمارة:

كشف الفنان حسن يوسف، عن رأيه في عهد الرئيس الراحل جمال عبد الناصر.

وقال يوسف، في حوار أجراه "مصراوي" مع النجم الكبير يُنشر تباعا: "عشت في مصر وقت الملكية، كنت طالب، كنا بنطلع من مدرسة الخديوي إسماعيل، نروح نحضر عيد الجلوس الملكي، ونقعد في قصر عابدين.. أنا بحب العهد الملكي عشان مشفتش منه أذى، ولم أرى أي أذى في أي عصر".

أضاف: "في عصر عبدالناصر، والدي لم يكن إقطاعيا، والدي كان موظفا، وعبدالناصر مخدش مننا حاجة عشان يبقى بينا وبينه موقف، لكن رأيي إن مصر مكانتش في حالتها الجيدة زي أيام الملكية.. أيام الملكية مشوفتش حد بيشتكي، الفقير كان بيلاقي والمتوسط والغني، الطبقات كانت متقاربة، مكنش فيه مثلا واحد عنده 100 مليار وواحد بيدور على رغيف العيش، مكنش فيه ده أيام الملك، كان فيه الوزير ووكيل الوزارة والمدير العام والمدير، فكانت الطبقات متقاربة، مكنش فيه حقد طبقي".

تابع: "أنا رأيي أن عهد عبدالناصر كان من العصور السيئة، عشان التأميم، من المشاهد اللي منسهاش، روحت أصور فيلم (7 أيام في الجنة) في قصر بالدقي، لقيت صاحب القصر قاعد مشلول وحاطط بطانية على رجله، بقوله حصل إيه؟ قالي التأميم، وأنا عندي أطيان وعندي وعندي فجأة لقيت نفسي باخد 100 جنيه في الشهر، ونادى على السفرجي، وقاله مين بيصرف عليّا دلوقتي؟ السفرجي رد وقاله بلاش الكلام ده، قاله لأ قول، قاله اللي بيجي بنقسمه سوا، هو راجل وجنايني وحارس، ويدين بالفضل للراجل لما كان غني، كانوا بيقسموا الـ100 جنيه اللي بياخدهم من الدولة، رغم إنه كان بيديهم للسواق، الحقد الطبقي بدأ في عهد عبدالناصر".

يذكر أن آخر أعمال الفنان حسن يوسف مسلسل "قضاة عظماء ج2" عام 2017، من ﺇﺧﺮاﺝ عبدالقادر الأطرش، تأﻟﻴﻒ أحمد وليد مارديني وأشرف شتيوي، وبطولة النجوم: أحمد عبدالعزيز، سوزان نجم الدين، طارق الدسوقي، كامل إبراهيم، وشريف عواد وغيرهم.