"حياة شاب باظت بسببه".. محامي الشاب خالد يكشف أزمات وليد منصور وقرار منعه من السفر

كتب-وائل توفيق:

كشف ياسر قنطوش محامي الشاب خالد أن المنتج الفني وليد منصور لا يقول الحقيقة، ويتهرب من دفع بقية أجر الشباب خالد 36 ألف دولار، وصدر قرار بمنعه من السفر طبقا لأحكام قضائية نهائية صدرت ضده.

وقال ياسر قنطوش في مقابلة مع "et العربي": "مشكلة الأستاذ وليد منصور إنه بيطلع يقول للناس عكس الحقيقة تماما، أنا عندي ورق ومستندات تثبث كل كلمة قالها للفنان الشباب خالد، وإحنا بقالنا النهارده بنحاول مع الأستاذ وليد من شهر 9 اللي فات، كل يوم بكره، وأنا طبعا عمري ما بطلع للرأي العام وبقول كلام إلا بمستند".

وقدم ياسر قنطوش لـ "et بالعربي" تسجيلا صوتيا ورسائل "واتس آب" لـ "منصور" تثبت أحقية الشاب خالد في مبلغ 36 آلف دولار بقية أجره عن حفله الغنائي الذي أقامه في 11 سبتمبر بالقاهرة.

وأضاف "قنطوش": "أنا قدمت شكوى للنقابة حكيت فيها الوقائع والمستندات ورسائل الواتس آب اللي بينه وبين الناس، الواتس آب يوم 12 مارس اللي فات ده، ما هو بيقول الحفلة من شهر 9، وأهو الأربعاء هتستلم 150 ألف، يوم 30 هتستلم 150 ألف، وباقي 15 رمضان، وقاله إن أنا ههحولك الفلوس 40 ألف دولار، مش عارف أقول إيه يعني، قاله البنك غلط وحول 4 آلاف دولار، وباقي له 36 ألف دولار، وهو عنده بلاغين على فكرة وده سبب والبلاغين المفروض إن فيه تحقيق، وحضر أول جلسة وقال الجسة جايه هجيب المستندات اللي تفيد إنه هو خد فلوس ومجاش الجلسة التانية".

وكان المنتج الفني وليد منصور قد قدم مستندات تثبت حصول الشاب خالد على مستحقاته المالية، وقرر على ذلك رفع دعوى "تشهير" على المطرب المغربي.

وأكد "قنطوش"، أن ما قدمه "منصور" ليس حقيقيًا، وأضاف: "الكلام ده مش مظبوط، هو الشاب خالد عنده مدير أعمال وعنده مديرة أعمال وعنده ناس بيراعوا شغله، طبيعي إن مش كل حاجة هيتكلم مع وليد فيها، لأن المبلغ بسيط 36 ألف دولار، هو إحنا عمرنا سمعنا إن الشاب خالد قال إن ليه فلوس عند حد بالكذب أو بالباطل، هينزل بيان على صفحته إنه مخدش فلوسه، ليه يعمل كده، إيه مصلحته في كده".

وتابع: "عندي 3 حالات، الشاب خالد آخر واحد فيهم، وده أقل مبلغ فيهم، الأستاذ عنان عوض 700 ألف دولار، شركة باي ميديا الكويتية 195 ألف دولار، الأستاذ خالد رأفت الشاب الغلبان ده اللي يعني حياته كلها باظت بسببه 500 ألف جنيه مصري".

حاول ياسر قنطوش إنهاء القضايا بشكل ودي مع وليد منصور لكنه لم يلتزم، أضاف "قنطوش": "أنا معنديش مشكلة شخصية معاه بالعكس، هو جالي هنا مرتين وحب يحل وملتزمش مع الناس دي، أنا عندي قضية مع المنتج الأردني عنان عوض أخد منه 700 ألف دولار عمل بيهم فيلم البدلة، وفيلم تصبح على خير، وما أدهوش حقه لحد النهاردة، المشكلة التانية مع شركة باي ميديا الكويتية ودي اسم كبير، وصاحبتها ست كويتية محترمة، تعاقدوا معاه على 3 حفلات، وقال هنفذ الحفلة وأخد منهم 195 ألف دولار، في قضية تالتة لشاب من محافظة الإسماعيلية، أنا مش هقول كلام مرسل يا جماعة، مش طلع للرأي العام، وأنا متحمل كل كلمة بقولها، ده عقد شركة وليد منصور، أخد من الراجل ده 500 ألف جنيه عشان يعملوا حفلة ومنفذهاش، الراجل ده عنده كانسر في المخ، ومريض وهربان من البيت بسبب الأحكام اللي عليه، استلف وخد قرض عشان يعمل حفلة".

وواصل: "ده حكم نهائي، الأستاذ وليد عليه أكثر من 48 حكم نهائي من موكلي، أنا أكتر من 10 أحكام، والمفتوح 103 حكم، وعلى مسئوليتي الشخصية وأبسط حاجة، إن أي حد يكلم حد في إدارة تنفيذ الأحكام، يحط اسم الأستاذ وليد يشوف عليه أقد إيه، وأنا مسئول عن اللي بقوله طبعا، أنا مشكلتي معاه إيه، أنا عايز أجيب حق موكليني، كله شيك، أنا مش عارف أقبض عليه، مش عارف أنفذ عليه الأحكام، فكل شيك كاتبه أنا باخد بيه حكم مدني، واخد شيك بـ20 ألف دولار، شيك بـ75 ألف دولار، ودي أحكام نهائية، وده قرار منعه من السفر بناء على الأحكام اللي أنا قولتها، رائد المكتب الفني لسيادة النائب العام بتاريخ 17/11/2020، رقم قرار المنع 14511 لسنة 2020، تم إدراجه يوم 30/11/2020، هو طول الوقت قلقان إن عليه أحكام نهائية".

واختتم حديثه قائلا: "أنا بوجه نداء لإدارة تنفيذ الأحكام الراجل ده عليه أحكام نهائية، يا جماعة الراجل ده بره إزاي، حد يجاوبني".

🔴ياسر قنطوش يرد بالمستندات على وليد منصور في قضية الشاب خالد ويشارك في ET بالعربي تسجيل صوتي لـ وليد يؤكد فيه أن مبلغ الـ 36 ألف دولار باقي أجر الشاب خالد عن الحفل لم يدفع بعد..🔻https://t.co/JJIhuK2ago

— ET بالعربي (@ETbilArabi) May 24, 2022