ريهام عبد الغفور: "تعرضت للتحرش في طفولتي من شخص قد جدي" (فيديو)

كتب- وائل توفيق:

أكدت الفنانة ريهام عبد الغفور عن تعرضها للتحرش الجنسي "الخفيف" على حد وصفها، في فترة طفولتها، وذلك أثناء استضافتها في برنامج "abtalks" مع أنس بوخش.

وقالت ريهام عبد الغفور: "وأنا صغيرة تعرضت لحاجة من حد مكنش متوقع خالص، مش هقول تحرش أو كده، حاجة في الاتجاه ده، كانت حاجة صادمة بالنسبالي، لإن هو كان راجل يكاد يكون أقد جدي، مش أقد أبويا، وبالنسبة لأهلي شخص موثوق فيه".

وتابعت: "دي قصة أنا تخطيتها السنة دي، وحكيت لجوزي لأول مرة والبيست فريند بتاعي وبس، ومحكتش لأي حد تاني".

وأضافت: "ابني يوسف الكبير، عارف برضه، بس مش بتفاصيل، دايما يوسف بيقولي إنت حاجتك الشخصية، الحاجات اللي تعرضتيلها، خلتك بقيت معانا حريصة زيادة، هو دلوقتي 21 سنة، زمان كان بيتخنق مني، بس هو دلوقتي حاسس إن اللي حصل ده حماه".

واستكملت: "أنا بتكلم في النقطة دي، لإن قعدت 40 سنة أو حاجة وتلاتين سنة، شايلة، فجأة قررت اتكلم فيها مع جوزي، فالحمد لله خفيت منها عشان كده بحكيها، وكنت وقتها 6 أو 7 سنين، وتعرفت على إحساس الشماتة وأنا في السن ده، لما تقال إن الشخص ده مات فرحت، مش الطبيعي أن طفل في السن يفرح أن حد يموت، وكانت أول وآخر مرة في حياتي أحس بالشماتة دي، لإن هو كان شخص غليظ وكبير أذاني، وأنا كنت جبانة أكتر من إني أحكي، كنت لما بشوفه بنزل استخبى تحت السفرة، ومش عارفة أقول اللي حصل".

وأوضحت: "هو كان تحرش على خفيف كده، الموضوع مش في عمق الموضوع، قد ما هو الصدمة في الشخص، أقد لما يكون عندك حد سنه كبير، مش عيل صغير مش شاب، حد كبير أوي، ويعمل كده في الأمان، ويخضك خضة، وأنا قعدت سنين مش بتكلم فيه مع نفسي، لإنه مرعب بالنسبالي".

يذكر أن أخر أعمال ريهام عبد الغفور مسلسل "منعطف خطر"، وهو مكون من 15 حلقة، وعرض عبر منصة "شاهد VIP" تأليف محمد المصري، وإخراج السدير مسعود، ومن بطولة باسل خياط وباسم سمرة ومحمد علاء وسلمى أبو ضيف وآدم الشرقاوي وتامر نبيل وحنان سليمان وغيرهم.