"بطاطة وفلفل".. قصة قطتي وفاء سالم بعد عملية شوهت وجهها

كتب- هاني صابر:

تحدثت الفنانة وفاء سالم، عن قطتيها "بطاطة وفلفل" التي توفيت احداهما وتعيش الثانية "فلفل" معها بمنزلها، وذلك بعد مرور شهرا على اجرائها عملية جراحية تسببت في تشوهات بوجهها.

وقالت وفاء، بالفيديو: "(فلفل) لما جاتني، جات صغيرة أوي، وكان عندي قطة اسمها (بطاطة) توفت وربنا افتكرها وزعلت جدا وقولت بعدها مش هربي قطط تاني، وههتم بالقطط الموجودة في الجنينة، وأكلهم، ومش هيبقى جوه حياتي قطة معينة".

وتابعت: "في يوم لقيت جارتي بتقولي سامعة صوت نونوه طول الليل، فلقينا قطة صغيرة أوي عمالة تصرخ، وروحت شايلاها وفضلت رايحة جاية في الجنينة مش عارفة أعملها إيه، ومحصلش معايا الموقف ده ان مخلوق ضعيف مش عارف تعمل معاه إيه".

وأَضافت: "وربنا كرمني جبتلها لبن وببرونة صغيرة، ولقيتها عضت الببرونة وقطمتها، وعندها احساس بالرفض، وبقينا بعد كدة أنا وفلفل أصحاب، وناقصها لسان وتتكلم".

وكانت وفاء سالم، كشفت مؤخرا تفاصيل خضوعها لعملية جراحية تسببت في تشوهات في وجهها من قبل أطباء معروفين في مجال التجميل.

وقالت وفاء خلال مداخلة هاتفية مع الإعلامي عمرو أديب في برنامجه "الحكاية": "أنا على مدار كذا سنة تعرضت لحقن وخيوط عند دكاترة كبيرة مشاهير، وكنت كل مرة أروح لدكتور على أساس يصلحلي غلط اللي قبله".

وأضافت: "كل مرة كنت بتفرج على النتيجة، الاقي تشوهات في وشي، والناس كانت بتتكسف تقولي، حتى كان أدائي مضايقني جدا، إزاي كمملثة وأنا في تشوهات في وشي، لغاية إني وصلت لمرحلة، إني مش هروح لأي دكتور، لإني كل ما أروح لدكتور يقولي احنا مش هنقدر نعمل أي حاجة".

وتابعت: "أنا دلوقتي بوري وشي لحضرتك من غير أي فلاتر ومن غير أي ميك أب، المناطق اللي في وشي أغلب الأساتذة قالولي مش هنقدر نتدخل لإنها مناطق أعصاب. لحد ما ربنا كرمني وقابلت دكتور س.غ، أنا ما كنتش فاهمة لما قابلته قالي احنا محتاجين نعمل إشاعة للمنطقة دي".

وأكملت: "الدكتور عمل العملية وصورها لي فيديو، لقى إن الصديد واصل للشبكية وللمخ، الحمد لله ربنا انقذني، أنقذ حياتي، بعيدا عن إني همثل أو مش همثل، الحمد لله إنه أنا تجاوزت دا".

وأردفت: "الصديد اللي حصلي كان من الحقن، وكان في خيوط جوا وشي، أنا تعرضت لطول الوقت لشكل من أشكال الابتزاز، وكان نفسي إن دا ما يحصلش".

واستطردت: "أنا رجعت بنسبة كبيرة جدا لشكلي، رجعلي وفاء، أنا عايزة وفاء اللي الجمهور حبها".

يذكر أن أخر أعمال الفنانة وفاء سالم مسلسل "القاتل الذي أحبني"، بطولة هاني رمزي، سهير رمزي، أحمد فؤاد سليم، محمد جمعة، ياسر فرج، رانيا منصور، تأليف صلاح عربي، إخراج عمرو عابدين.