عمرو سلامة: "بنشتغل سنين على فيلم عشان الناس تشوفه في أقل من ساعتين"

كتب- هاني صابر:

تحدث المخرج عمرو سلامة، عن أكثر المفارقات غرابة في صناعة السينما.

وكتب سلامة، عبر حسابه على إنستجرام: "من أكثر المفارقات غرابة، إنك في صناعة السينما ممكن تشتغل سنين على مشروع علشان الناس تشوفه في أقل من ساعتين، وليهم فقط اللي بيشوفوه على الشاشة، لا يخصهم بالمرة الوقت والجهد والأموال اللي راحت علشان المشروع يطلع للنور".

وتابع: "يكاد الأمر يشبه الامتحان، لكن الفرق إنك بتذاكر لسنين علشان تمتحن في ساعتين، لكن الفكرة اللي بتساعدك تتخطى المفارقة دي كصانع سينما، إنك زي ما إنت عامل الفيلم للناس، أنت عامله لأسباب ثانية".

واستكمل: "إنك بتطلع حاجة كانت واقفة في زورك..إنك بتكتشف نفسك وكمان بتعالجها وإنت بتحكي الفيلم.. إنك بتريح ضميرك.. إنك كنت في رحلة فيها نشوة الإبداع والخلق والتكوين وإعطاء الروح لمجرد فكرة هائمة في عقلك.. إن وجودك بتحس للحظات إن له لازمة.. إنك بتشوف لحظات السحر".

وأضاف: "تواصل روحاني من القلب للقلب لما الناس تتأثر بمجرد صورة على شاشة، وتحس للحظة إنك كنت مجرد وسيط لنقل فكرة من السراب لقلوب الناس أو يمكن دي الحاجات اللي بتقولها لنفسك علشان تتخطى قد إيه في فرق بين سنين.. ومجرد ساعتين إلا شوية".

وينتظر المخرج عمرو سلامة، طرح فيلمه السينمائي الجديد "بره المنهج" يوم 15 ديسمبر الجاري في جميع دور العرض.

فيلم "بره المنهج" قصة عمرو سلامة، والسيناريو مشاركة بينه مع الكاتب خالد دياب، وإنتاج شركة لاجوني للمنتجة شاهيناز العقاد.

يخوض بطولة الفيلم، الطفل عمر شريف، وماجد الكدواني وروبي ودنيا ماهر، والعديد من الأطفال ونجوم الشرف الكبار.