خاص| حلمي بكر عن أغنية "على الكوتشي": "إحنا في مصيبة سودة"

كتب- عبد الفتاح العجمي:

قبل نحو 3 أسابيع، نُشر على موقع "يوتيوب" فيديو كليب تحت عنوان "على الكوتشي" لهيثم عبد الله وكارمن فريد.

الأغنية حققت حتى الآن نحو 520 ألف مشاهدة، ومن بين كلماتها: "أنا عايز ألطم على خدكم.. أنا عايز أديكم في وشكم.. نفسي أخدكم ضربة قاضية.. مني ليكم 100 طلقة في قلبكم.. أنتوا كلكم على ده.. على الكوتشي.. أنتوا كلكم تحت ده.. الكوتشي".

"مصراوي" من جانبه تواصل مع الملحن حلمي بكر، وأخبرنا أنه لم يشاهد الكليب.

وحول رأيه في اسم الأغنية؛ قال: "إحنا وصلنا للوزة وسوستة والكلام الفاضي ده.. ولسه".

وأضاف: "طول ما في مصيبة سودة والناس عمالة تطبطب عليها وتحييها ابقى قابلني".

وبسؤاله عن سبب انتشار هذه النوعية من الأعمال؛ قال: "دوّر جوه النقابة واسأل وقولهم مين اللي ورا الحاجات دي كلها".

وبسؤاله "مين يا أستاذ حلمي؟"؛ قال: "لأ.. مش هقول.. لكن هقول النهاية قربت مفيش غير كده".

اختتم: "إحنا بقينا بنروج للسلع البطالة وأنا أرفض ذلك.. للأسف المصيبة كبيرة وهتبقى أكبر".

ومن بين تعليقات الجمهور على الكليب عبر "يوتيوب": "موهبة تستحق الدفن.. بجد الكليب الوحيد اللي جمع بين الإزعاج السمعي والبصري مع بعض.. كل ما اتحنق من أهلي اسمع الكليب وأموت من الضحك شكرا جدا.. الناس دي ناوية تجيب أجل هاني شاكر.. لما يكون معاك 3 جنيه فكة وتعمل بيهم كليب.. الأغنية اللي اضحكت الملايين" وغيرها.

وفي 17 نوفمبر الماضي، أصدرت نقابة الموسيقيين قائمة المطربين الممنوعين من الغناء في مصر ممن ليس لديهم تصريح للعمل، وهم مطربي المهرجانات: حمو بيكا، وحسن شاكوش، وكزبرة وحنجرة، ومصطفي زكريا الشهير بـ"مسلم"، وأبو ليلة، وأحمد قاسم الشهير بـ"فيلو"، وأحمد موزة، وحمو طيخة، وريشا كوستا وسمارة، وشواحة، وولاد سليم، و"العصابة"، و"الزعيم"، وعلاء فيفتي، وفرقة "الكعب العالي"، ومجدي شطة، و"وزة"، و"شكل"، وعمرو حاحا.