تيسير فهمي عن وفاة شقيقها في حريق مستشفى خاص: كان المفروض يخرج النهاردة

كشفت الفنانة تيسير فهمي، تفاصيل وفاة شقيقها ويدعى "علي" جراء حريق شب في مستشفى خاص، يوم الاثنين.

وقالت فهمي، خلال مداخلة مع برنامج "تحت الشمس" عبر قناة "الشمس": "أخويا كان المفروض يخرج من المستشفى النهاردة، والصبح كنا رايحين عشان نخرجه لقينا المستشفى متشمعة وفي بوليس ونيابة بعد ما حصل حريق جوه".

أضافت: "أنا مش عارفة إيه حصل بالظبط، قالوا إن اتنين اتخنقوا كانوا موجودين في الرعاية منهم أخويا، واتنين اتصابوا، لكن أنا معرفش الحريق سببه إيه ولا اتخنقوا من إيه وإزاي معرفوش يخرجوا المرضى.. كل دي حاجات إحنا مش عارفينها لحد ما تخلص تحقيقات النيابة".

تابعت: "تصريح الدفن لسه متطلعش لحد دلوقتي عشان نقدر ندفنه.. في روايات كتير للواقعة لكن أنا مقدرش أفتي في شيء مشوفتوش بعيني، ننتظر تقرير النيابة حتى نعلم ما حدث".

اختتمت: "أخي كان تعافى وكان خارج النهاردة من المستشفى وكنا رايحين ناخده الساعة 9 الصبح، لقيناه اتوفى واتنقل مستشفى إمبابة العام ليتم وضعه في الثلاجة حتى يخرج تصريح الدفن".

وكشفت تحريات مباحث العجوزة، عن وفاة شقيق الفنانة تيسير فهمي ويدعى "علي" جراء حريق شب في مستشفى خاص، يوم الاثنين.