"إنت فاكرني؟".. رشا مهدي تحكي موقفًا كوميديًا مع عبدالرحمن أبوزهرة

كتبت- بهيرة فودة:

روت الفنانة رشا مهدي موقفًا كوميديًا جمعها بالفنان الكبير عبد الرحمن أبو زهرة خلال تصوير أحد مشاهد مسلسل "أستاذ ورئيس قسم".

وكتبت رشا منشورًا، عبر حسابها الشخصي بموقع "فيسبوك"، :" بمناسبة الكلام عن علاقة عمنا الأستاذ عبدالرحمن أبو زهرة بالممثلات والنجمات في اللوكيشن و إن محدش "سلم من لسانه".

أضافت رشا :"أنا اشتغلت مع الأستاذ كذا عمل، آخرهم مسلسل أستاذ و رئيس قسم مع الزعيم، ومشفتش من أستاذ عبدالرحمن غير كل خير طبعا، بس آخر عمل ده بصراحة "مسلمتش من لسانه" و هحكي ايه اللي حصل".

تابعت :"أول يوم تصوير شفته وكنا من سنين متقابلناش فسلمت عليه وقام ربنا يديله الصحة وسلم عليا بس كان بسرعة أوي ورجع قعد تاني! بصراحة اتفاجئت وخفت يكون زعلان مني فبعد ما سلمت ع الناس رجعتله و قعدت جنبه وفضل ساكت فقلقت أكتر وقلتله حضرتك فاكرني؟ فمن غير ما يبصلي قالي آه فاكرك".

استطردت رشا :"بصراحة استغربت أكتر من طريقة المعاملة وفضل ساكت فقلت له طب فاكر اشتغلنا إيه مع بعض؟ قالي آه وسكت برضه، بصراحة الموضوع استفزني أكتر فقلت له طب أنا اسمي إيه؟ وهنا انفجر فيا وقالي بصوت عالي "رشا مهدي فاكرك يا بنتي والله فاكرك واشتغلنا كذا و كذا و كذا ولو انتي بقى فاكرة كنت بقول سيبوني أركز قبل التصوير عشان أعرف اشتغل وإنتي كمان قومي ذاكري و بقى نتساير بعد الشغل يا بنتي".

وأكملت :"أنا طبعا مقدرتش أمسك نفسي، وضحكت وهوا بيزعق و اللوكيشن كله ضحك، وهوا حبيبي ممسكش نفسه وضحك وطبطب عليا وقالي يابنتي كنت مركز متزعليش مني وقعد يسأل على ماما و أخواتي و عليا ويقولي رأيه في شغلي، وبعدها قمنا نحضر، فجأه الزعيم راح للأستاذ عبدالرحمن وهوا مركز تاني وقرب منه وقاله بصوت عالي "انت فاكرني"؟

وأضافت رشا :"طبعا مش محتاجة أكمل افيه أنت فاكرني ده كان عامل إيه في اللوكيشن طول التصوير، عمنا عبدالرحمن حضرتك نجم وفنان وأب من الزمن الجميل، ربنا يديك الصحة طول عمرك قامة وقيمة ومبتبخلش على حد بخبرتك وفنك، انت فاكرني طيب؟".

كما نشرت الفنانة رشا مهدي المنشور، عبر حسابها الرسمي بموقع "تويتر"، وعلقت :"سؤال للأستاذ عبد الرحمن أبو زهرة، أنت فاكرني ؟".

سؤال للأستاذ عبدالرحمن أبو زهرة .. أنت فاكرني؟ pic.twitter.com/2ueJ1tRGS4

— رشا مهدي Rasha Mahdi (@RashaMahdi) July 20, 2020