بسبب كورونا.. رامي جمال ينصح متابعيه: "بلاش تجمعات عشان ما نندمش"

كتبت- بهيرة فودة:

وجه الفنان رامي جمال بعض النصائح لمتابعيه بسبب فيروس كورونا المستجد، عبر حسابه بموقع "فيسبوك".

وكتب رامي منشورًا: "تعالو نتكلم جد شوية، أولا انا متفائل جدا اننا لو عملنا التعليمات اللي الدول اللي سبقتنا عملوها من حظر منزلي ونضافة وتعقيم، والله هنفوت مرحلة الخطر وأنا مش مع الخوف المبالغ فيه، بس انا مع الحرص المبالغ فيه في مرحلة زي دي".

أضاف رامي: "احنا شعب بيبان معدنه وحضارته في وقت زي ده، بلاش تجمعات بلاش علشان ما نندمش في وقت متأخر، تاني حاجة ودي مهمة جدا جدا ياريت نراعي مشاعر كبار السن وأصحاب الأمراض المزمنة والمناعية، اللي عمالين نطمن بعض ان هما اللي في خطر والباقي في أمان الكلمة الحلوة صدقة والمعلومة الطبية تتقال بذكاء علشان منزودش قلقهم".

وتابع :"بإذن ربنا الأطفال والشباب مفيش خوف عليهم الخوف منهم، لأن منظمة الصحة والأرقام بتقول كده يبقي ياريت نبقي عارفين اننا ممكن نبقى سبب في عدوى لناس بنحبهم، وممكن بتجنب الاختلاط والبوس والأحضان والخروج لفترة ننجيهم من خطر ممكن نندم عليه باقي عمرنا، وأخيرا ربنا هيحفظنا والله ده يقيني في ربنا بس نعمل اللي علينا مش لازم نستني ان يتفرض، انا براهن علي ذكاء المصريين وحبهم لبلدهم".

يُذكر أن رامي جمال طرح خلال الفترة الماضية، أغنية "سقف" من كلمات الشاعر مصطفى حسن، وألحان بلال سرور، وتوزيع توما، وهي من ضمن أغنيات ألبوم "أنا لوحدي" الذي طرح يوم 14 فبراير الماضي.‏