شيرين تكشف عن إصابتها بـ"ورم" ولهذا السبب ريهام عبدالغفور ترفض القبلات.. 7 تصريحات لنجوم "الفن×أسبوع

إعداد- منى الموجي:

تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة.. وفي السطور التالية، يستعرض "مصراوي"، أبرز 7 تصريحات لأهل الفن في البرامج الفنية خلال الأسبوع الماضي:

شيرين

استضافت المذيعة رشا نبيل في برنامج "مصر النهادرة"، المعروض على التليفزيون المصري، الفنانة شيرين، التي كشفت خلال الحلقة عن إصابتها بورم في الأحبال الصوتية، مشيرة إلى أنه نفس المرض الذي أصاب "كوكب الشرق" أم كلثوم.

وقالت شيرين "بعد مسرحية (المتزوجون) عملت عملية ورم في الأحبال الصوتية، زي السيدة أم كلثوم مكنتش أعرف، والدكتور اكتشفها، واداني كورتيزون بس منفعش، عملنا جراحة وقعدت شهر مبتكلمش قالي انتي خدعتيني كنت فاكرك انتي رقيقة ورفيعة لقيت فتلتين مش أحبال صوتية، كمان ده سبب ان صوتي اتغير كدا بعد العملية".

نيللي كريم

حلت الفنانة نيللي كريم ضيفة على برنامج "كل يوم"، الذي يقدمه الإعلامي عمرو أديب على قناة "ON E"، وعندما سألها عن الطريقة التي يحددون بها الأجر الذي يتقاضاه الفنان، قالت "بالبركة، على حسب، في الأفلام بتاخد أقل بكتير من اللي بتاخده في المسلسل، لأن تكلفة الفيلم ميتحملش تكلفة مسلسل، صناعة الأفلام قلت الفترة الأخيرة لكن الناس بدأت ترجع للإنتاج، أنا شخصياً لما بلاقي سيناريو حلو عجبني حتى لو ميزانية أقل هعمله لأني بحب السينما اكتر من المسلسلات، وبتنازل عن أجري اللي مفروض أخده".

مادلين طبر

وعلى قناة الحياة، حلت الفنانة مادلين طبر ضيفة على برنامج "العيلة"، وتحدثت عن رغبتها في الحصول على الجنسية المصرية، وقالت "حاسبني على المصريين في لبنان، الناس زعلت في برامجي إني باستخدم بعض المفردات المصرية وحزينة إني بعيدة عن الأعمال اللبنانية".

وتابعت: "هقدم رسميًا إني آخد الجنسية وليس من خلال الزواج، لازم يطلع قرار إن طالما مسيرة الإنسان محترمة بعد 25 سنة ياخد الجنسية؛ الجنسية المصرية أهم وأعظم من أن تُؤخذ عن طريق زواج".

هاني رمزي

وكشف الفنان هاني رمزي عن اتباعه حمية غذائية معينة، بهدف إنقاص وزنه، وقال في برنامج "معكم" المعروض على قناة CBC "كان وزني جامد جداً، شقيت جامد جداً عشان اخس، ووصلت للوزن اللي كنت بحلم بيه، وأوعدك إني أقدر أحافظ عليه، مشكلتي بس في الحلويات، الشيكولاتات والبسبوسة، نزلت 22 كيلو".

وتابع "فكرت أعمل عملية الناس كلها بتعملها، قالوا لي لو عملت عملية هتنزل نزول جامد جداً وهتلاقي وشك تأثر، المفروض الرياضة مع الرجيم".

مايا نصري

وقالت الفنانة مايا نصري في حوارها مع الإعلامية منى الشاذلي في برنامج "معكم": "فيه بنوك ممكن تدي قرض للناس اللي عايزة تعمل عمليات تجميل، مش شايفة ده مشكلة مش بس بوتكس، فيه ناس محتاجة عمليات تجميل، وحرية شخصية والبنوك لما بتصدق".

وقالت إنها لو محتاجة عملية تجميل لن تمانع في إجرائها "لو انا محتاجة فيه تشوه أو ضرورة ملحة هعملها، ولبنان مش البلد الوحيد اللي فيه الناس بتعمل عمليات تجميل".

آيتن عامر

وقالت الفنانة آيتن عامر في حلقة جديدة من "بوضوح" الذي يقدمه الإعلامي عمرو الليثي، إن كواليس فيلم "علي بابا"، شهدت الكثير من المصائب، وتابعت "متعبة جداً، بس الحمدلله الفيلم طلع حلو، ودي اقصى هدية ممكن ناخدها بعد التعب ده كله، كريم كان على طول عنده برد، وأنا وقعت كان ضهري هيتقطم، طول الوقت كنا بنلاحق على المصايب".

ريهام عبدالغفور

وفي حلقة جديدة من برنامج "أنا وأنا" الذي تقدمه المذيعة سمر يسري على قناة ON E، قالت الفنانة ريهام عبدالغفور "اتجرأت أكتر اكيد بطور نفسي مع السن والخبرة بقيت ابص للمواضيع بشكل مختلف، وأحكم عقلي، فيه حاجات معينة مهما اتغير بقت سقف مقدرة شخصية مش هعرف أعملها، البوسة بالذات عشان بقرف"، وضحكت لتتابع بعد ذلك "بقرف فعلاً بس مش ده الموضوع، مش حاسة إني عندي المقدرة ليها".

وعن ارتداء المايوه في الأعمال الفنية "بلبس مايوه في الحياة، ولم يصادفني إنه جالي شغل ألبس فيه، زمان كان تفكيري لا خالص أنا هموت والشريط ده هيعيش، دلوقتي إحنا في زمن اليوتيوب ممكن حد يصورني وأنا لابسة مايوه في الحقيقة وهتبقى موجودة، بقيت واضحة مع نفسي أكتر، وكده أو كده بتكسف وبلبس الحاجات العادية".