"على طريقة بالطو".. بيتر ميمي: "اتضربت ضرب وعيان طلعلي موس قالي اشتغل بده"

كتبت- مارسيل نظمي:

تحدث المخرج بيتر ميمي، عن تجربته مع التكليف بعد تخرجه في كلية الطب عام 2012، قبل عمله في الفن، وقارن ما تعرض له بأحداث مسلسل بالطو الذي يعرض حالياً عبر منصة Watch it، ويدور حول صعوبات يواجهها طبيب شاب في بداية تكليفه في إحدى القرى النائية.

وكتب "ميمي" منشوراً على صفحته الخاصة عبر "فيسبوك"، جاء فيه: "بمناسبة مسلسل بالطو اللي بيحصل فى المسلسل كان بيحصل زمان بالظبط.. أنا استلمت تكليف سنة ٢٠١٢ على أساس إني طبيب ثالث فى إحدى الوحدات الصحية في البدرشين، وللأسف الوحدة كان فيها تصدع في المبنى وكنا فى أوضتين (حرفياً اوضتين) تبع الجمعية الشرعية".

وتابع المخرج بيتر: "وللأسف الطبيب الثاني كان عنده امتحانات ماچستير واخد إجازة.. والطبيب الأول ومدير الوحدة كان زهق من الليلة كلها وراح مستشفى تانية.. وبعد أسبوعين في الوحدة لاقيت نفسي مدير الوحدة ومفتش الصحة وأنا عندي ٢٤ سنة.. ومش عارف منين يودي فين".

وأوضح بيتر ميمي أن مفتش الصحة مسؤول عن المواليد والوفيات والتطعيم والطوارئ والجراحة والباطنة والختم (والختم ده أهم حاجة قالولي ده لو اتسرق منك هتتسجن).

واختتم: "كان بيعدي عليا حاجات غريبة مرة واحدة دخلت عليا قارصها عقرب وجايبة فى إيديها العقرب ويوم جالي واحدة مشربة بنتها اللي عندها أسبوعين لبن جاموسة ومرة رحت اعاين جثة واطلع شهادة وفاة والجنازة اكنك فى فيلم الهروب.. ومرة اتخانقت مع أهل مريض والممرضة قالتلي متجيش بكره عشان دول ناس صعبة ممكن يقتلوك.. ومرة عيان لاقاني بدور على مشرط فخرج لي موس من بقه قالي اشتغل بده.. ومرة حد ضرب حد بسكينة وأهله مسكوني وضربوني أنا علشان مش لاقيين الواد اللي ضربه بالسكينة.. ده أنا اتضربت ضرب مخدهوش جدي فى فيلم بوحة.. كل ده وعندي ٢٤ سنة.. كنت baby boy يعني".

ويذكر أنه يعرض حالياً فيلم "شلبي" للمخرج بيتر ميمي، ومن بطولة كريم محمود عبدالعزيز، روبي، بيومي فؤاد، حاتم صلاح، وتأليف مصطفى حمدي.