دنيا عبد العزيز تجيب.. هل تزوجت زوجها تنفيذا لوصية والدتها الراحلة؟

كتب- عبد الفتاح العجمي:

ردت الفنانة دنيا عبد العزيز، على ما تردد أنها تزوجت من زوجها المهندس مصطفى كامل، تنفيذا لوصية والدتها الراحلة.

وقالت عبد العزيز، خلال حوارها ببرنامج "كلام الناس" عبر قناة "mbc مصر": "الكلام ده مش حقيقي خالص، هو مكنش في أي حاجة أصلا بيني وبين مصطفى لحد من قريب، بعد ما أمي مشيت بفترة طويلة".

أضافت: "لكن آخر حد كانت ماسكة إيده وهي بتمشي كنت أنا ومصطفى، وكانت بتبصله وبتدمع، كما لو أنها بتقوله خلي بالك منها، كمصطفى الصديق اللي هي بتحبه أكتر حد من صحابي، كانت بتعتبره ابنها وكانت متعلقة بيه وهو كمان كان متعلق بيها، ودي حاجة خليتني أقرب من مصطفى من غير ما آخد بالي، حب أمي ليه وحبه ليها".

تابعت: "أنا كان لازم وحاجة أساسية عندي إني لو ارتبطت بإنسان إنه يكون بيحب أمي وهي بتحبه، ولما موضوعنا اتحول من الصداقة لعلاقة أهلي قالولي ده حبيب أمك، ودي من أكتر الحاجات اللي حسستني إن أمي مطمنة ومرتاحة".

واحتفلت الفنانة دنيا عبد العزيز، يوم الجمعة 27 مايو الماضي، بزفافها على المهندس مصطفى كامل، في مدينة نويبع بسيناء وسط حضور الأهل والأصدقاء والفنانين.

يذكر أن آخر أعمال الفنانة دنيا عبد العزيز مسلسل "ملف سري"، مع النجوم: هاني سلامة وعائشة بن أحمد وإدوارد ونضال الشافعي وغيرهم، من إخراج رؤوف عبد العزيز، وذلك في رمضان 2022.