بالفيديو- قالولي مستحيل تمشي وعملت 42 عملية.. أبرز تصريحات سماح أنور على "dmc"

04:01 م السبت 21 يوليو 2018

تطبيق مصراوي

لرؤيــــه أصدق للأحــــداث

كتبت- منى الموجي:

استضاف الإعلامي أسامة كمال، عبر برنامجه "مساء dmc" المعروض على قناة dmc، الفنانة سماح أنور، وتطرق في حواره معها إلى أسباب عدم تواجدها على الساحة الفنية في الفترة الأخيرة، وهل تسبب آراءها السياسية في هذا الابتعاد، وتحدثا عن ذكرياته مع عدد من أشهر أعمالها الفنية، منها مسرحية "راقصة قطاع عام" ومسلسل "ذئاب الجبل".

وفي السطور التالية أبرز ما جاء على لسان سماح أنور في الحوار..

- لا أعمل بالسياسة، أعمل بالفن، ولدى البعض هناك خلط بين السياسة والوطنية، "أي شخص يتكلم في الوطنية وعن حبه للوطن وصالح الوطن من وجهة نظره يتقال عليه بيتكلم في السياسة، وده مش حقيقي الوطنية غصب عننا لازم نقف جنب بلدنا في أزمتها ودي مش سياسة".

- الفن أكل عيشي والحاجة اللي بعشقها بجد.

- بتضايق لما حد يقول على محمد مرسي رئيس، كونه حكم البلد سنة ده شيء ميلزمنيش بحاجة، ولا اعتقد إن فيه مصري أخد موضوع أن محمد مرسي رئيسه بجد.

- كانوا بيقولوا مستحيل أمشي، وأزمتي الصحية استمرت 11 سنة، وفعلا كنت عارفة كده لحد ما حصل طفرة علمية نفعت مع حالتي.

- لا أحب نظرة الشفقة، والموت عندي أحسن.

- سافرت أمريكا وجنيف والنمسا وعملت 42 عملية في وقت كبير جدًا، ورجعت لمصر عشان استنى اشوف هيحصل ايه، في امريكا كنت بسوق عربيتي ولوحدي، ساكنة في شقة وعندي عربيتي وبروح أجيب حاجتي من السوبر ماركت، واشتريت كلاب، فيه حاجة في الشوارع اسمها "رامب- ramp" عند كل رصيف عشان الكرسي بعجل، الحكاية دي محتاجينها جدا في مصر، ومحسيتش اني اتشليت إلا لما رجعت مصر.

- عملت 38 فيلم و12 مسلسل و3 مسرحيات، مش كلهم أولادي خالص، واكتر حاجة حبيتها مسرحية "ولاد الشوارع" و"راقصة قطاع عام"، في الدراما "رأفت الهجان، سنبل وذئاب الجبل"، في السينما بحب "امرأة واحدة لا تكفي وحالة تلبس".

- فنانين كتير مش بيحبوا يشتغلوا مع محمد صبحي، لأنهم مش بيحبوا يروحوا في معادهم.

- عندي 12 قطة، كانوا الأول 28 قطة، ورعايتهم تحتاج شغل كتير، عيشتهم حلوة أوي، الحيوانات بشكل عام عيشتهم حلوة في الزمن ده.

- أحاول التواجد في الوسط الفني لكن هناك معوقات كتير جدًا، أكون شغالة في حاجة وفجأة يقولوا وقفت، أمضي عقد في عمل والاقي انه اتعرض بحد تاني، وهي أمور لا أتوقف عندها بس تكرارها بقى ملفت.

- شريف منير أخرج لي افتتاح مهرجان السينما أيام سعد الدين وهبة، كنت بعمل استعراض حفل الافتتاح بأكثر من لغة وتبرعت بيه للمهرجان، وشريف تبرع أنه يخرج الاستعراض ده وكان فيه أول مرة جرافيك على المسرح وحاجات جامدة.