عمرو مصطفى: تنازلت عن حقوقي في "بشرة خير" عشان غبي

كتبت- منى الموجي:

تحدث الفنان عمرو مصطفى عن علاقته بالمنتج محسن جابر، والخلاف بينهما، خلال حواره مع المذيعة أسما إبراهيم في برنامج "حبر سري" المعروض على قناة القاهرة والناس.

وقال عمرو "كعلاقة شخصية أستاذ محسن حبيبي، لكن لو بنتكلم عن العلاقة بيني وبينه كبيزنس لا أنا ليا حقوقي كتير، وكنت متغاضي عنها، ومش هتغاضى عنها الفترة الجاية، أنا ممضتش على الديجيتال، الحقوق دي بتتاخد ليه".

وتابع "أهالي المبدعين مش لاقيين الدوا، وبقول لأي فنان متتنازلش عن الأغنية لو دفعولك 200 مليون جنيه، لأنها هتجيب اكتر، المفروض المبدع على رأس الهرم"، موضحا "دلوقتي المبدع بيعمل الأغنية ربنا منحه هبة، وعمل لحن والمؤلف كتبها. ممكن أغنية واحدة تعيش أسرة كاملة بولادهم لو نجحت، مثلا أغنية بشرة خير تعيشني أنا وولادي وولاد ولادي وولادهم طول العمر تجيب فلوس، عاملة 500 مليون مشاهدة يعني 500 ألف دولار، مش معايا حقوقها، عشان غبي اتنازلت عنها عشان غبي، المطرب قالك مش هغني إلا لما اخد حقوقها".

وتطرق "عمرو" خلال حديثه عن إثارته الجدل بتقديم مشروعه الخاص بالذكاء الاصطناعي وعن محاولته تقديم صوت كوكب الشرق أم كلثوم على إحدى أغانيه الخاصة وهو ما لاقى انتقاداً وهجوماً من قبل المنتج محسن جابر والذي يمتلك حقوق الملكية الفكرية لعدد من حفلات "أم كلثوم" وهدد بمقاضاته، إلى جانب نشوب خلافاته مع ورثة "كوكب الشرق" قبل أن يعلن "عمرو" عن جلسة جمعته معهم لينهي الخلاف .