هدى عمار تكشف حقيقة ارتدائها الحجاب وأسباب ابتعادها عن الغناء (فيديو)

كتب- وائل توفيق:

كشفت الفنانة هدى عمار أسباب غيابها الفترة الماضية، وذلك أثناء استضافتها في برنامج "كلام الناس" المعروض على فضائية "إم بي سي مصر".

وقالت: "كنت ماضية مع شركة نصر محروس، وتعطلت حوالي 3 سنين، بدأنا حقيقي في الشغل واشتغلنا، ولكن الحياة ممشيتش بالشكل اللي كنت متوقعاه، غير كده الحياة، اللي فيها مشاكل وعيلة وحاجات شخصية، أحيانا بتحتاج مني أركز شوية".

وأضافت: "أنا مش مختفية ولا حاجة، دايما بيتقال إني أنا اعتزلت، سافرت ألمانيا أو جوزي مش عايزني اشتغل، مع إني مطلقة، وبيتقال تحجبت".

يذكر أن الفنانة أنغام كشفت كواليس غناء الفنانة هدى عمار تتر مسلسل "هوانم جاردن سيتي"، وذلك في برنامجها "أنغام" المذاع عبر فضائية "دي إم سي".

قالت: "جالي تتر مسلسل حلو جدا، نجح جدا، وأنا اللي قولت ساعتها للأستاذ راجح إن لازم هدى عمار اللي تغنيه، كان هوانم جاردن سيتي، وسمعلي اللحن، روايح الزمن الجميل، قولتله مش لايق عليا أنا، قولت ده هدى تغنيه أحلى مني بكتير، لإن هدى كانت زميلتي".

وأضافت: "بالعكس، أنا شفتها وسمعتها، ودني كانت سامعة هدى بتقول الجملة أكتر مني، وسبحان الله، هو تقريبا خرج من عندي راح لها، وممكن هدى متكونش تعرف ده، أنا كان ممكن آخده منجحهوش، اللحن ساعتها أنا سامعاه بصوتها، لإن أنا حافظاها وعارفاها كويس قوي، لإن كنا بنغني في كورال الأطفال مع بعض، لان أنا عارفه هي يليق عليها إيه؟، قولتله ده في حد يغنيه أحسن مني جدا، هي صوت رايق وجميل".