سبب غيابه وهذا ما قاله له السيسي.. أبرز تصريحات محمد فؤاد في "أسرار النجوم"

كلمات- ياسمين الشرقاوي:

حل الفنان محمد فؤاد ضيف حلقة أمس الخميس ببرنامج "أسرار النجوم"، المذاع عبر قناة FM الإذاعية، تقديم المذيعة إنجي علي، وخلال الحلقة تحدث فؤاد عن العديد من الأمور المتعلقة بحياته الفنية والشخصية، منها فترة غيابه عن الساحة الفنية والهجوم عليه بعد أغنية "الحفلة".
ونستعرض في التقرير التالي أبرز تصريحات محمد فؤاد لـ "أسرار النجوم":

- تحدث محمد فؤاد عن فترة غيابه قائلًا: "نقدر نسمي أن فترة غيابي كانت سدة النفس على البهجة، حتى لو بغني حاجة رومانسية لازم أكون مبتهج عشان أقدمها بشكل جيد وتنال رضا الناس، وأعلنت أنني مجند هبقى موجود في أي مناسبة وطنية، من أول العك اللي حصل وقلت ده وبعض الناس لم يعجبهم الجملتين وواخدين مني موقف أني بساند بلدي ومصر يا جماعة انتوا هتهرجوا؟.. ومن ليس له خير في مصر ليس له خير في أهله، أنا لن أبارز حد بوطنيتي، ومن لا يعجبه أقول له متشكر يا سيدي وربنا يسامحك ويهديك وتكون أكثرنا وطنية ومحبة لمصر".

- وأضاف: "كنت بسمع أغنية شريفة فاضل ابن حبيبي يا نور عيني، وكبرت على فكرة ذهنية لا يمكن التخلص منها، وأسعد لحظات حياتنا لما كنا نغني مع والدتي، بدأت أبطل أتكلم عن ده؛ لأن الناس بدأت تلومني من أهلي ومعرفش اجيب سيرة مصر من غير ما أبكي، ولكن بطلت هذا وبحارب نفسي، أصبح فيه حد قاعد لنا على أخلاقنا ويوصموننا بأننا كاذبين، وأدعي لهم إن ربنا يهديهم وكلنا مذهولين من المصريين الذي يكرهون بلدنا بهذه الطريقة".

- وتطرق "فؤاد"، عن مقابلته مع الرئيس عبدالفتاح السيسي: "أنا قلت له أخي إبراهيم فؤاد بيقول لسيادتك البلد أمانة في رقبتك وكانت الحفلة في الجلاء، وطلع سيادة الرئيس شكر الجميع وسلم علينا، وهناك كلمة منه هزتني جدا وتأثرت لشعوري أن شقيقي ينتفض خوفا على البلد وهو راح عشان هذا البلد تكون في أمان، إحنا كنا في حالة ضياع ومصر كانت رايحة ومش جاية ويارب اللي يكرهها، وسيادة الرئيس قال لي (البدل اللي إحنا لابسينها أكفان لنا وقول لأخوك ينام مرتاح وميخافش على مصر طول ما إحنا موجودين)".

- وعاد للحديث مجددًا عن غيابه عن الساحة الفنية قائلًا: "لو كنت رجعت قبل كده كنت هبقى كذاب، لكن رجعت وطلباتكم أوامر من محمد فؤاد وكل كارهي الغياب أنتم حافز لمحمد فؤاد وهحاول ابسطكم أوي، تاريخي وضعته كله تحت قدمي وليه مستكترين على مصر تاريخ محمد فؤاد، ولا نساوي قشاية دون مصر، أنا مش مصدق أنني مصري".

- وتطرق "فؤاد"، في حديثه عن أغنية الحفلة التي أثارت جدلًا واسعًا منذ طرحها، قال: "الناس رافضة الولاد إنهم يشتغلوا معايا وهما مصريين، بلاش تكون وظيفتك تقطع في الناس وتأخذ فلوس وتمشي، وهؤلاء الشباب العاملين في مجال المهرجانات لو عملوا حاجة غلط نقومهم ولا يمكن نشطبهم من الحياة، لو بيقول كلمتين غلط أو عدى الخط الأحمر بلغ عنه، وعمري ما ندمت على أغنية عملتها، عندهم حساسية من زوكش وفيفتي وطيبة الدنيا فيهم وبيحبوا فؤاد وعمرو دياب، أنتوا هتكرههم في بلدهم ليه، من يخطئ نبعده خارج الطابور وهما في الشارع مؤثرين، المهم كلامهم لا يكون خارجا".

- وعن تعرضه للهجوم بسبب الأغنية، قال: "أنا بقالي 35 سنة بغني، ولينا حاجات نخاف عليها جدا ونعمل حسابها، ومبديش ودني لأحد ينتقدني، والهجوم تجارة رخيصة والسكوت من ذهب ولكي لا أخطئ في أحد، والسوشيال ميديا عملت عقدة عند الناس، من يريد أن يستثمر مع ربنا أشياء تدر عليه رحمة وخير يستغل هذه الفترة بأن يمد يديه بالمساعدة لمصر في أي أمر".

- وكشفت محمد فؤاد، خطته لطرح ألبومه الجديد قائلًا: "كل 20 يوم نازلي أغنية ومفيش ألبومات مرة ثانية، ولن ننزل نشغل الناس بـ10 أغاني، واللي كان بيكون فيهم أغاني مش جيدة، واللي معندوش أغنية حلوة أوي مش هينزل بها، وحتى سأطرح صورا جديدة تحكي عن الأغنية، وهي فكرة عبدالرحمن ابني وهم اللي مسكوا الشغل الخاص بي وطلع عندهم حق ورؤيتهم صح، وابني حاليا 24 سنة وكان في أغنية (الحب الحقيقي) عنده 3 سنوات".

- وعن كواليس حذف أغنيته الجديدة "أحكيلك"، بعدما طرحها عبر "يوتيوب"، قال: "فيه شخص بيهرج وحذرناه كتير أو مش عاجبه مواقف محمد فؤاد وهيقف عند حده، ووعدت الناس كلها أني مش هسيب حقي، واللي عمله ده لازم يتحاسب عليه، هو حذفها ورجعها وحذفها تاني، إزاي جاتله الجرأة إنه يعمل كدا، سأقدمه للمحاكمة ولن أتركه، وإن شاء الله هاخد حقي بالقانون".

- وتذكر فؤاد الفنان الراحل عامر منيب، قائلًا: "أفتقد عامر منيب كان أجدع بني آدم عرفته في الوسط الفني بزيادة، وهو كان حبيب الكل، رائعا ولطيف ولا يغضب أحب وفرحت جدا لما شوفت بناته".