صاحب مهرجان "شيماء": أستعد لاختبارات نقابة الموسيقيين

كتب- عبد الفتاح العجمي:

قال يوسف سوستة، صاحب مهرجان "شيماء"، إن عمره 23 عاما، وبدأ الغناء منذ الصغر، موضحا: "أول مرة غنيت كنت في 3 ابتدائي في إذاعة المدرسة، وحاصل على دبلوم سياحة وفنادق، واحترفت الغناء من 4 - 5 سنين، ومعنديش حد معين قدوة ليّا، وأنا بعمل كل الألوان وبسمع كل الناس وكل أنواع المزيكا".

أضاف سوستة، خلال مداخلة هاتفية مع برنامج "تحت الشمس" عبر قناة "الشمس": "الميل للنوع ده من الأغاني اللي بنقدمها عشان الجمهور هو اللي جابرنا على كده، والغرض أن الأغاني دي يسمعها كل الفئات مش بس فئات الناس اللي في الشارع والأفراح، ومش أي كلام يتقال عشان برضو في أطفال".

تابع: "أنا شغال في مجال الأفراح من بدري، بغني كلام الشارع القديم والمهرجانات، كلام بتاعنا إحنا الناس البسيطة، أنا ساكن في عين شمس، وأنا لازم أكون ماشي مع مود الناس، والإيفيه بتاع شيماء جِه من بساطة الشارع، وقصدت إن الناس تضحك وتنبسط وبس، كل الناس بتدور على شيماء لحد ما يكتشفوا في الآخر أنها بطة".

وردا على سؤال "مش خايف تتمنع زي مطربي المهرجانات اللي اتمنعوا؟"؛ قال: "أنا بحترم كل الناس وكلهم على دماغي، وأستعد لاختبارات النقابة وبخلص الأوراق خلاص".

وتصدر مهرجان "شيماء" تريند مواقع التواصل الاجتماعي نظرًا لغرابته وما تضمنته كلماته، فضلاً عن طريقة تصوير الفيديو كليب.