"مش كورونا"- سميرة سعيد في حفلها: "صوتي تعبان ودرجة حرارتي 39.5"

كتبت- منى الموجي:

تصوير- محمود عبدالناصر:

اعتذرت الفنانة سميرة سعيد عن استكمال برنامج حفلها الذي أقيم أمس الثلاثاء على مسرح النافورة في دار الأوبرا المصرية ضمن فعاليات مهرجان الموسيقى العربية بذورته الثلاثين، كاشفة عن إصابتها بالبرد.

وتابعت "كنت حابة أقعد معاكم وقت أطول، بس أنا صوتي تعبان وده مجهود كبير، ودرجة حرارتي 39.5، بس مش كورونا ده برد عادي أنا عملت pcr"، مؤكدة أن أغنية "هوا هوا" ستكون الأخيرة في الحفل، رغم أن برنامج الحفل تضمن أغاني أخرى لم تقدمها من بينها "كل دي إشاعات".

وتذكرت الفنانة سميرة سعيد، خلال الحفل الموسيقار الكبير بليغ حمدي، وقالت "هغني حاجة كلاسيكية من الحاجات العتاقي، اللي كنت بعملها زمان كلمات سيد مرسي وألحان بليغ حمدي من الحاجات اللي بحبها ومخدتش حقها وكنت زعلانة لانها حلوة جدا، هغنيها عشان بحبها وعشان روح بليغ حمدي تكون ما بينا، أغنية (كتر الكلام)".

وقالت سميرة إن حياتها الفنية شهدت الكثير من التطورات، ما بين الكلاسيك والحديث، وتنقلت بين الحداثة والأصالة.

وتابعت "احترت اغني ايه الحاجات الجديدة ولا القديم والنوستالجي، ايه رأيكم.. فيه أغنية في النص من ألحان الموسيقار العظيم صلاح الشرنوبي (لعلمك انت)".

ووجهت الفنانة سميرة سعيد الشكر لوزيرة الثقافة الدكتورة إيناس عبدالدايم، ولإدارة مهرجان الموسيقى العربية في دورته الثلاثين.

وفي بداية كلمتها، قالت سميرة "المخرجة جيهان مرسي، عشرة عمري صاحبتي وحبيبتي أصرت اكون موجودة في المهرجان ده، خصوصا انه يحمل اسم الدكتور جمال سلامة، اللي مهما اتكلمت عليه مش هوفيه حقه".

وأضافت "دكتور جمال جزء من تاريخي، مفيش حاجة حلوة عملتها قد شغلي معاه، (حلو حبك) كانت البداية كل الأغاني اللي بغنيها لغاية النهاردة وجوايا من ألحان جمال سلامة، سعيدة اننا بنكرمه وبنديله حقه الادبي والفني، وده السبب الحقيقي اللي خلاني اكون النهاردة وياكم، غير اني مبسوطة بوجودكم وحضوركم، لأني بحب اي حد بيجي دار الاوبرا بحس انه هو بيحب الفن الحقيقي شكرا".

سبق فقرة سميرة سعيد في حفل اليوم على مسرح النافورة، فاصل أحياه الفنان اللبناني زياد برجي.