فيديو- أحمد حلمي يوضح حقيقة لقاءه بـ''ميسي''

كتبت- عبير القاضي:

قال الفنان احمد حلمي، إنه لا صحة لما يتداوله البعض حول تصويره إعلان إحدى الشركات مع لاعب الأرجنتين ليونيل ميسي، موضحاً '' أنا مقولتش أني قابلت ميسي ولا حتي شوفته''، علي حد قوله.

وأضاف حلمي عبر حسابه الشخصي على فيسبوك اليوم الأربعاء، ''يا اصدقائي وصديقاتي الاعزآء، انا مقولتش اني قابلت ميسي ولا حتي شفته .. انا قولت ''ده اعلاني الجديد مع ليونيل ميسي'' .. انما كل واحد مننا صور الجزء بتاعه في بلده .. وده الطبيعي اللي بيحصل في الاعلانات اللي بيكون فيها كذا شخصيه من جنسيات ودول مختلفة.. ممكن تكون غلطتي اني موضحتش طريقة عمل الاعلان .. بس ده لاني تخيلت ان دي حاجه ممكن تكونوا عارفينها''.

وتابع قائلا: ''علي فكره في اعلانات كتير اجنبيه اتصورت بالطريقه دي برضه .. بس طبعا كله لازم يكون بالاتفاق والموافقه مع كل الاطراف اللي هتظهر في الاعلان .. يعني كل واحد لازم بيبقي عارف مين الشخصيه اللي هاتظهر معاه في الاعلان ولازم يكون موافق عليها كمان .. والا كان بقي زمان كل واحد راح عمل اعلان لنفسه حط فيه كل نجوم العالم''.

وأكد '' انا لما عملت الصفحه دي عملتها علشان اكون متواصل معاكوا، مش علشان اخدعكوا، لان اخر حاجه ممكن اعملها في حياتي هي اني اخدعكوا او اضحك عليكوا .. لاني قبل ما اخدعكوا هاكون بخدع نفسي، اوعدكوا المره الجايه في اعلاني مع ''جيمس بوند'' هابقي دقيق اكتر من كده، مافيش اعلان مع جيمس بوند ولاحاجه، انا بهزر لحسن تاخدوها بجد، وكل سنه وانتوا طيبين''.

لمشاهدة الفيديو … اضغط هنا

لمتابعة أهم وأحدث الأخبار اشترك الآن في خدمة مصراوي للرسائل القصيرة.. للاشتراك ...اضغط هنا