ندى موسى عن قرار دخولها عالم التمثيل: "درست فلسفة وماما قطعت عني المصروف"
كتب- محمد جمعة:
روت الفنانة ندى موسى عن تفاصيل بداية مشوراها الفني ورغبتها في دخول عالم التمثيل منذ صغرها.
وقالت ندى، خلال حوارها مع برنامج "مساء DMC" المذاع اليوم الثلاثاء: "والدي كان عنده مكتبة ضخمة وأخدت كتاب لتوفيق الحكيم اسمه عودة الروح، بابا استغرب، بدأت أقرأ مش فاهمة أي حاجة، فبدأت أسأله عن الفلسفة".
وأضافت: "قررت أدرس الفلسفة مخصوص عشان أبقى ممثلة مختلفة، كنت شايفة كده وقتها.. لكن عمومًا دراستي للفلسفة خلتني أفكر في الموضوعات والحياة بشكل مختلف".
وتابعت ندى: "دخلت معهد فنون مسرحية وكان في تشجيع ليا، لكن بابا توفى في السنة دي، وماما اتخضت وحست إن التمثيل هيبقى عالم غريب بالنسبة لها، وقررت تقطع عني المصروف عشان أصرف نظر عن التمثيل، فبدأت أنزل أشوف الحياة، واشتغلت مرة واحدة في حياتي في حاجة غير التمثيل، بس كنت بروح متأخر ساعتين عن معادي".
واستطردت: "بعد كده دخلت عالم التمثيل فعلًا، ووقفت أمام الكاميرا لأول مرة في حياتي في فيلم أوقات فراغ".
فيديو قد يعجبك:
