كريم محمود عبدالعزيز: "كنت مجتهد لحد 5 ابتدائي وأبويا كان نفسه أبقى دكتور"

كتب- محمد أبوالمجد:

قال الفنان كريم محمود عبدالعزيز: "أنا كنت طالب مجتهد لحد 5 ابتدائي وبعد كده باظت مني بسبب ظروف حصلت في حياتنا ودماغي بدأت تروح في أماكن تانية"، مضيفًا: " الاحصائيات بتاعت الأسبوع كان لازم يمضي عليها أبويا وأمي ومكنتش بحب أزورها لكن في حاجات مكنش ينفع أوريها لهم واتقفشت في مرة".

وأوضح "كريم" في حواره لبرنامج "صاحبة السعادة" على فضائية "دي إم سي" اليوم الاثنين: "اتخانقت في مرة في سنة 2 ثانوي بسبب الغش كنت عايز معلومة من اللي قدامي وكان بيكتب كتير جدًا وأنا كنت حاسس إني بضيع وهعيد السنة ولما لقيت مفيش فايدة وقفت في وسط اللجنة قولتله اديني سؤال ياعم أو أي إجابة".

وتابع: "مرة تانية حاولت أغش من واحد قولتله عايز أغش يا عم قالي ثانية واحدة وبعدها راح ادانى ورقته واخد ورقتي بس عدت يعني"، مؤكدًا: "اخر سنة في التعليم كان مفيش مذاكرة خالص ومكنتش عارف رايح امتحان مادة ايه ومكنتش بذاكر خالص".

وأردف: "أبويا كان نفسه في حاجات تانية بس مقدرتش أحققها له، قالي نفسي أشوفك لابس بالطو ابيض دكتور قولتله مستحيل صعبة جدًا على دماغي وأنا هدخل أدبي، ولقيته قالي عايز أشوفك دكتور في جامعة لكني قولتله عشان نبقى متفقين دي مش منطقتي لأني مش متخيل نفسي بدرس للطلاب وكده".