"أبويا هيطرد معايا".. نجل أحمد شيبه يكشف تفاصيل صوره والده برفقة مشجعات الأرجنتين

كتب- محمد أبوالمجد:

كشف محمود أحمد شيبة، نجل الفنان أحمد شيبه، تفاصيل نشره لصورة والده برفقة عدد من مشجعات الأرجنتين، في قطر بدلًا من وجوده في دبي لإحياء حفل غنائي، قائلًا: "أنا اللي ناشر الصورة ودا بسبب أن أبويا طردني من البيت وقالي خليك عند ستك، بسبب إني كنت في حفلة وكان معايا أغنية جديدة لأبويا فسربتها عندي، راح حلف عليا بالطلاق مدخلش البيت تاني".

وقال "محمود" في مداخلة هاتفية لبرنامج "حضرة المواطن" على فضائية "الحدث اليوم" مساء الثلاثاء: "كنت عايز أخد حقي من أبويا، فلقيت الصورة دي فقلت أخليه يتكرش معايا عند ستي"، موضحًا: "أمي لما شافت الصورة والمنشور بتاعي احتضنتني وقالتلي حبيبي يا أبني".

وتابع: "أبويا قالب عليا الدنيا، وعمي شيبه أتصل بيا وأخويا حمو برده ومردتش عليهم وكل البيت بيرنوا عليا ومش برد عليهم، لأني عارف ايه هيحصل"، مؤكدًا: "صورة أبويا اللي نشرتها على صفحتي كانت في دبي فعلًا ودول ناس من الأرجنتين فعلًا بيتصوروا معاه، هو كان عنده حفلة في دبي ووقت الماتش كان فاضي فبعض مشجعات الارجنتين اتصوروا معاه، والصورة وصلتني وأنا مطرود فأخدت حقي بالطريقة".

وأردف: "أخدت حقي من أبويا بالطريقة اللي ترضيني أنا، أعمل ايه مهو كده كده أبويا هيتطرد معايا ومش هيروح البيت وهيجي يونسني عند ستي "، موضحًا: "أبويا عمال يبعتلي تسجيلات على الواتس أب بس قلبي مش جايبني إني أفتحها .

ودخل الإعلامي سيد علي في وصلة من الضحك، معلقًا: "مش عارف أقول ايه بصراحة بنخلف العيال عشان يعملوا فينا كده".