"مشهد الفرح الأهم".. ندى موسى تكشف تفاصيل شخصية عزة في مسلسل المشوار

كتب- محمد أبوالمجد:

كشفت الفنانة ندى موسى، تفاصيل أدائها لشخصية عزة في مسلسل المشوار، والذي عرض رمضان الماضي، قائلة: "كنت بصور مسلسل في لبنان ورجعت عندي كورونا وجالي تليفون من المخرج محمد ياسين، قالي عايز أشوفك، وكنت عايزه أخف دلوقتي حالًا، ولكنه قالي هستناكي لحد ما تخفي وهقعد معاكي".

وقالت "ندى" في حوارها لبرنامج "صاحبة السعادة" على فضائية " دي إم سي" اليوم الاثنين: "روحت للمخرج محمد ياسين واتكلمنا عن الدور بعد ما أتعرف، وشخصية عزة كان من أمتع الدوار اللي اشتغلت عليها في حياتي، وقالي حاجه فرقت معايا قالي إنتي شايفة الشخصية عايزة كده ولكنها هتتعمل كده لأنك هتبقى في حتة تانية".

وتابعت: "أنا مش بحب اتفرج على نفسي في أي عمل ليا، ولكني بعد شخصية عزة كانت أول مرة أتفرج على نفسي في حياتي وألاقي نفسي مش أنا"، مؤكدًا: "المخرج محمد ياسين كان بيوجهني لكل حاجه وفهمت تعليماته لما شفت المسلسل".

وأردفت: "اتكلمنا أنا والمخرج محمد ياسين وأختار معايا مدربة الرقص، واتعلمت الرقص واتطلب مني أعرف أساسيات الرقص، وكنت يوميًا بروح أشوف الديكور أنا والفنان أحمد صفوت، واشتغلت على شخصية عزة بطريقة عمري ما اشتغلت بيها قبل كده، وكنت حاسه إني عايزه أكسر الدنيا وأعمل كل حاجه".

وأكدت "ندى": "مشهد الفرح هو الأهم لأنه كان مفتاح شخصية عزة، وكنت بخاف في البداية من المخرج محمد ياسين وبعد ما اشتغلت معاه لقيته عمره ما اعترض على أي حاجه بقولها وفهمت ليه بيعمل معايا كده".