"عزمني على المسرح".. لميس جابر تكشف تفاصيل أول لقاء مع زوجها الفنان يحيى الفخراني

كتب- محمد أبوالمجد:

كشفت الدكتورة لميس جابر، زوجة الفنان الكبير يحيى الفخراني، تفاصيل أول لقاء بينها وبين الفنان يحيى الفخراني، قائلة: "إسعاد كانت صغيرة في ثانوي وأنا كنت في كلية الطب وكنا أصحاب أوي وبنحكي وننظر وشبطت فيا وصممت أنها تيجي الكلية عشان تشوف المشرحة، وأقولها هتخافي تقولي لأ، وبدلًا ما أدخلها المشرحة دخلتها المتحف فقلت أجزاء بشرية متحنطة، قالتلي ايه دا دا يخوف دا ولا هي هنا".

وأضافت "لميس" في حوارها لبرنامج "صاحبة السعادة" على فضائية "دي إم سي" اليوم الاثنين: "قولتلها تعالي أوريكي المشرحة، ودخلت إسعاد المشرحة لقيتها بتسألني بتشرحوا ازاي وبتعملوا ايه وازاي هو بس كده دي المشرحة، قولتلها مخوفتيش ازاي كده"، موضحة: "وأحنا مروحين هي لقطت إعلان فرقة طب عين شمس المسرحية على مسرح الهوسابير وكانت مسرحية الناس اللي في السماء الثامنة لعلي سالم".

وتابعت: "لقيت إسعاد بتقولي انتوا عندكم فرقة تمثيل في الكلية قالتلي معرفش مش واخده بالي فبصينا لقينا الإعلان والفرقة بتعرض على مسرح الهوسابير، واتفقنا وروحنا نتفرج على الرواية في المسرح"، موجهة حديثها للفنان الكبير يحيى الفخراني قائلًا: "الكلام دا في المسرح حصل في دخلتك أنت علينا وقتها".

وأكدت: "وقتها يحيى شبه عليا قالي أنا شوفتك فين قبل كده، وسألني وقتها انتي معانا، وقتها قال معلش أوعوا بقى وراح عازمنا ودفعلنا 10 صاغ تذكرتين، واتفرجنا أنا وإسعاد وقتها على الجزء الأول وخوفنا من التأخير فروحنا جري وبعد كام يوم جبنا أمي معانا كمحرم عشان نتفرج على باقي الرواية، واتفرجنا عليها على نصين".

فيما قال الفنان الكبير يحيى الفخراني: "أنا فاكر إني عزمتكم بس وقتها كنت برسم على لميس لأني مش بعزم أي حد، وكانت أحلى أيام".