منى زكي: أنا مش "كيوت" وشريف منير سندني كتير في "كده أوكيه"

كتب- محمد أبوالمجد:

علقت الفنانة منى زكي، على ظهور جزء من طفولتها ظهرت في بعض أعمالها، قائلة: "أنا مش كيوت خالص وبستغرب الناس شايفاني كده إزاي؟".

مضيفة: "الأستاذ سمير عصفوري إداني القماشة بتاع شخصيتي في مسرحية كده أوكيه، وشخصية شربات فعلًا موجودة، وجه في دماغي الدادة بتاعت خالتي".

وأضافت "زكي" في حوارها لبرنامج "صاحبة السعادة" على فضائية "دي إم سي" اليوم الثلاثاء: "الفنان شريف منير كان بيفرشلي الإفيه في مسرحية كده أوكيه، وكان بالنسبة لي هو اللي بيسندني في الشخصية بتاعتي"، موضحة: "كل ما بشتغل معاه بتبسط أوي، لأنه خطير ومش لازم يكون بطل العمل لكنه بيشيل المَشاهد للممثل اللي معاه".

وتابعت: "جملة أنا عايزة أمثل يسعدك، هي أول جملة بنينا عليها شخصية شربات في المسرحية"، موضحة: "لما عملت مسرحية عفروتو كنت محتاسة، وبعدها ابتديت أفهم كتير عن المسرح؛ لأن كان معايا ناس عظيمة زي الفنان الراحل حسن حسني وماجدة زكي ومحمد هنيدي"، مؤكدة: "لما بدأت أعمل مسرحية كده أوكيه بقيت عارفة أقول إفيه على الهواء، ونرتجل فيه لمدة طويلة، واتعلمته ونفذته في المسرحية".