"تستاهل نطبطب على مشاعرها"..شيرين رضا عن واقعة التنمر على فتاة من ذوي الاحتياجات الخاصة

كتب- محمد خميس:

علقت الفنانة شيرين رضا، على واقعة التنمر التي تعرضت لها الفتاة التي تدعى هاجر من ذوي الاحتياجات الخاصة، قائلًة:"دافعت عن هاجر لأنه لازم حد يدافع عنها وزي ما سمعت كلام وحش لازم تسمع كلام حلو"، مضيفة: "لما شفت واقعة التنمر ادايقت أوي ومتخيلتش قد أيه هي ادايقت أكتر مني، والبنت هي اللي حطت رسالة المتنمر على صفحتها، وقلت لازم اخليها تسمع كلام حلو عشان كده نشرت البوست عندي عشان هي تستاهل تسمع كلام حلو".

وأضافت "رضا" في مداخلة هاتفية لبرنامج "كلمة أخيرة" مع الإعلامية لميس الحديدي، على فضائية "ON E" اليوم الثلاثاء، أن الشخص المتنمر مش عارف هو بيأذي الناس ازاي، متسائلة: "إيه الفائدة أو ايه الاستفادة من التنمر؟!"، موضحة: "يمكن الشخص اللي تنمر بالبنت دي يتكسف على دمه، وهو اتدعى عليه بما فيه الكفاية".

وتابعت: "لازم نطبطب على مشاعرها، وهي الدنيا كده دواره، والبنت بتدي ضحكة جميلة ليه تسمع كلام زي دا، والصدفة وربنا وقعني في سكتها عشان اجيبلها حقها"، مؤكدة: "احنا ناقصنا الرحمة، لأنه بدون الرحمة هيجي عنف".