أحمد السعدني: "جلست مع شخص من الدواعش وكان يحضر تصوير بطلوع الروح"

كتب- وائل توفيق:

يشارك الفنان أحمد السعدني في بطولة مسلسل "بطلوع الروح" الذي يعرض ضمن الموسم الدرامي الرمضاني الحالي 2022.

وقال أثناء إجرائه مداخلة هاتفية لبرنامج "كواليس" عبر أثير إذاعة "نجوم إف إم": "كنت بصور مع مخرج عظيم برضه أستاذ يسري نصر الله، وجالي مسج واتس آب بين المشاهد من الأستاذة كاملة أبو ذكري، بتقولي عايزاك معايا في مسلسل، ومعرفش في إيه، قولتلها أنا معاكي، لما عرفت الحدوتة وقريت وعرفت الموضوع والدور، كان حماسي أون فاير، وأكيد مكانش فيه تردد لحظة في قبول عمل زي ده، وشرف ليا المشاركة في عمل زي ده".

وتابع: "لما رحت أول مقابلة، مقعدتش مع الأستاذ كاملة خالص، كانت قاعدة مع الديكور والتصوير والمساعدين، قالتلي أنا مش عايزة أقعد معاك دلوقتي خالص، أنا هقعدك مع اتنين، الأستاذ علاء، ده من أهل الرقة كان عايش هناك، وشخص آخر ده من الدواعش نفسهم، الاتنين دول استفدت منهم بشكل كبير قوي، سواء بالمادة المصورة أو المكتوبة وكواليس الحياة هناك، وهم كانوا معانا أثناء التصوير طول الوقت".

وأضاف السعدني "إحنا بنصور في لبنان، مخرجناش بره لبنان خالص، إحنا معانا ناس كتير قوي لبنانيين، بيقولوا لنا إحنا منعرفش الأماكن دي خالص، الحقيقة كاملة أبو ذكري مش طبيعية، أنا مشفتش كده بصراحة، أنا سعيد ومن حسن الحظ إني اشتغلت مع الست دي".

ويُعرض مسلسل بطلوع الروح يوميًا على قناة MBC مصر في تمام الساعة 9 مساءً، وأيضًا على منصة شاهد vip، ويشارك في بطولة المسلسل منة شلبي، إلهام شاهين، أحمد السعدني، محمد حاتم، عادل كرم.