"ربنا يُديم كل لحظة حلوة بتمر علينا".. تامر أمين مهنئًا المصريين بأعياد الربيع

كتب- معتز عباس:

وجه الإعلامي تامر أمين تهنئةً إلى المصريين بمناسبة الاحتفال بعيد شم النسيم وأعياد الربيع، قائلًا: "كل سنة وكل المصريين طيبين وكل لحظة حلوة بتمر علينا ربنا يديمها ويحفظها نعمة على كل الشعب".

وقال أمين، خلال تقديمه برنامج "آخر النهار"، المذاع عبر فضائية "النهار": "أنا عارف إنه يوم شقا بالنسبة لحضراتكم، خروج وشمس وفسيخ ورنجة وملانة وبيض وحاجات صعبة"، متابعًا: "دي عادتنا ولا هنشتريها؟ أنا مش هغلِّس عليكم النهارده، وأقول لكم بلاش فسيخ، لأني عارف إنكم ارتكبتم الجريمة خلاص، ودلوقتي كل واحد فيكم بيحاول يتخلص من آثار الجريمة، اللي بيدهن لمون أو بيستحمى بالجاز، وطالما انتم مبسوطين أنا سعيد ومبسوط".

وتابع الإعلامي: "أعياد الربيع في كل سنة بتفكرنا بمثل هذا الجو من العام بيبقى ممتع ويدعو للخروج، وقضينا أطول ويك إند في الحياة منذ عيد تحرير سيناء، لكن في النهاية جاء علينا بالفرحة والسعادة وأهم حاجة أن الأسرة تكون اتجمعت".