إعلان

تصريحات نجوم الفن × أسبوع | "دايت" مها أحمد ونرمين الفقي تكشف عن عيوبها

09:52 م الجمعة 08 فبراير 2019

إبحث عن لوجو مصراوي داخل الموقع يومياً خلال شهر رمضان للفوز بجائزة

تسجيل الدخول

إعداد- منى الموجي:

تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة. وفي السطور التالية، يستعرض "مصراوي" أبرز 7 تصريحات لأهل الفن في البرامج خلال الأسبوع الماضي "ليلى تتحدث عن حريق منزلها والفنانة التي وقفت بجوار والدتها، أحمد آدم يرد على انتقاده بسبب تكرار تقديم القرموطي، وكيف تخلصت مها أحمد من وزنها الزائد؟،.."، وغيرها من التصريحات التي نستعرض أبرزها في السطور التالية..

ليلى علوي

استضاف الفنان شريف منير وابنته "أسما" في حلقة جديدة من برنامجهما "أنا وبنتي" المعروض على قناة ON E، الفنانة ليلى علوي، والتي تحدثت عن "الجيرة"، وطبيعة علاقتها مع الجيران.

وقالت ليلى "الجيرة حلوة وساعات تحس ان الجيران كل واحد مشغول زيادة عن اللزوم، وتحس انك في العمارة لوحدك، ده حلو في حاجات ومش حلو في حاجات تانية، أنا مثلا مرة بيتي اتحرق مكنتش موجودة فيه ماما بس وخالد كان عنده 3 سنين، فاكرة ومشكورة جدًا عبير صبري في 12 ديسمبر الساعة ستة الصبح، جابت بطانية لفت خالد وفضلت شيلاه لحد ما ماما تقفل، وجيراني قعدوا يجيبولي بيجامات وبانتوفل وأكل".
وتابعت "معاشرتش جيران حشرية خالص، بس أنا على اد ما أنا كويسة ولذيذة وخفيفة وكده في الأخر عندي حتة خواجاية شديدة شوية لو حد زود".

أحمد آدم

حلّ الفنان أحمد آدم ضيفًا على برنامج "كل يوم" مع الإعلامي وائل الإبراشي، وتحدث عن فيلمه الأخير "قرمط بيتمرمط".
وقال آدم ردًا على عدم خروجه من عباءة القرموطي "أنا ظلمت القرموطي، أنا عامل 25 فيلم بطولة منهم 3 القرموطي، برجعلها بناءً على طلب الناس"، متابعًا "كان تحدي بالنسبة لي في أول بطولة ليا إني أرفض تقديمه، المنتج اللي كنا هنشتغل مع بعض كان عايز نعمل الشخصية، قلتله لا عندي فيلم (ولا في النية أبقى فلبينية) وده فيلم كوميديا من نوع مختلف، عشان متلزقش فيا شخصية القرموطي، وبعدها قدمت (شجيع السيما) ثم (الرجل الأبيض المتوسط)، كنت ببعد عشان محدش يقول مع إنه مش بيهمني اللي يقول يقول".

وأضاف "برنارد شو عنده جملة بفتكرها طول الوقت، لما سألوه عن أسباب النجاح، قال (معرفش، أنا أعرف أسباب الفشل)، قالوله إيه، فرد (محاولة ارضاء كل الناس)".

مها أحمد

حلت الفنانة مها أحمد ضيفة على برنامج "قهوة أشرف" الذي يقدمه الفنان أشرف عبدالباقي على قناة الحياة، وكشفت عن الطريقة التي خسرت بها وزنها الزائد، موضحة أنها ليست ضد إجراء عمليات التجميل، لكن عليها التأكد من نسبة نجاحها "أضمن الأول لو كويسة ومش هتسيب أثر إيه يعني".
وتابعت "طول عمري بعمل ريجيم حصلي حاجة كنت هعمل برنامج واتأخر اوي، وبعدين قالوا هنستأنف قلت ليه لأ اعمل دايت، واخدت أدوية حرق قوية جدًا ومتعبة جدًا ومرهقة، مش أي حد ياخدها مبرضاش اقول على اسمها عشان مضرش حد، حرمت نفسي من كل حاجة وجالي أنيميا حادة ودخلت المستشفى، ونقلولي دم، وغلطة عمري إني رحت مع السقا الجيم، وبعدين عملت بالونة المعدة".

نرمين الفقي

استضافت الفنانة إسعاد يونس في برنامجها "صاحبة السعادة"، الفنانة نرمين الفقي، وبسؤالها عن عيوبها التي قد تتسبب في "تطفيش" الرجل، قالت "فيا حاجة كويسة، اللي بحسه بيبان عليا أوي، وهحسسه للقدامي ودي أصعب حاجة، أنا مش دبلوماسية وده غلط، وواضحة زيادة عن اللزوم".
وكشفت عن عيب ثاني في شخصيتها "العيب التاني لو حد استمر يستغل تفكيري ممكن اتعصب".

نداء شرارة

وأطلت نجمة برنامج "ذا فويس" المطربة نداء شرارة على جمهورها عبر برنامج "كلام ستات"، المعروض على قناة ON E، وأكدت أنها تعرضت لكثير من الانتقادات بسبب اتجاهها للغناء بالحجاب.
وقالت "من أول ما طلعت على المسرح في ذا فويس، لقيت ان القريب مصدوم اكتر من الناس الغريبة، الفئة المقربة معارضين مش عشان الحجاب لا عشان إزاي أطلع أغني، اخدت على نفسي وعد لو طالعة اقدم فن حلو مش هقول لربنا شكرًا بخلع الحجاب".
وتابعت "بعد البرنامج جاتلي عروض شيلي بقى الحجاب لكن رفضت، رغم كل الهجوم اللي اتعرضتله، كل الموضوع اني ملتزمة حلمت حلم وصدقت نفسي، وربنا اداني على اد نيتي، بيني وبين ربنا عمار مبحبش أقف ادام المراية في يوم الأيام وأكره نفسي".


هيثم شاكر

واستضاف الفنان هشام عباس، في حلقة جديدة من برنامجه "شريط كوكتيل" المعروض على قناة الحياة، الفنان هيثم شاكر، والذي تحدث عن ذكرياته مع فكرة صناعة "شريط كوكتيل"، موضحًا "عملت شريط كوكتيل وأنا صغير كنت بشتري الشريط بتلاتة جنيه ونص الكواليتي المحترم، اروح للراجل بتاع محل الكاسيت ومحضر أسامي الأغاني واسم المطرب جنبها، واعدي عليه تاني يوم يكون عملهولي".

أشرف عبدالباقي

الفنان أشرف عبدالباقي كشف عن الطريقة التي اختار بها تقديم مسرحية "جريما في المعادي" عبر برنامج "عين" المعروض على قناة الحياة، وقال "زوجتي شافت العرض على مسرح بروداوي، قالتلي عليه ورحت شفته في لندن، شفته اكتر من مرة، وراسلت أصحاب الفكرة ولقيت عندهم استعداد أخد حقوق النشر وتحمسوا جدًا ودخلنا في مفاوضات، واتفقنا معاهم ومضيت عقد ودفعت الفلوس".
وتابع "اشتغلت على تمصيره عشان محدش يحس ان ده عمل أجنبي".

فيديو قد يعجبك: